HALAKOAK DIRA DONOSTIAKO ROCK DISEINATZAILEAK (1. SAIOA)

Rockaren ingurura alderdi (kartelak, disko azalak) eta estilo ezberdinetatik gerturatzen diren diseinatzaileak bilduko dituen konpilazio baten faltan, erradiografia (partzial) honetan donostiar eszenan ezinbestekoak diren lau izen bildu nahi izan ditugu gure gizartean geldirik dagoen sortzaile artistiko musikalen zentsua biziberritu asmoz. Zenbat aldiz solastu dira hedabideak gazte profesional hauetaz? Zenbatek jarraituko du diseinatzaile gisa lanean, 10 edo 15 urte barru? Erantzuna dena delakoa ere, ongi etorriak (baita hemen aipatuak izan ez zaretenak ere).

Jarraian beraz, lau neska gipuzkoar elkarrizketatuko ditugu. Bigarren saioan rockaren inguruko musika eta kultur arloetan dabiltzan lau diseinatzaile elkarrizketatuko ditugu.
 

MAIDER NÚÑEZ aka IRON MAIDER (Pasaia, 1991)

Batxilergo artistikoa ikasi zuen Usandizaga institutuan. Ikasketak amaitzean, publizitate arloko Grafika goi mailako ikasketa zikloa ireki zuten institutu hartan bertan, eta horri ekin zion. “Arte grafikoak bete betean lantzen zituen ziklo honek, eta hau da betidanik gustuko izan dudan arloa”. www.ironmaider.com eta http://ironmaider.tumblr.com/ linketan izango duzu haren berri gehiago.

Markatu zaituen diseinatzaile bat: Wes Wilson. Ezagutu ditudan diseinatzaileetatik lehenengoa izan zen, eta biziki gustatu zitzaidan. Haren influentzia nabaria da nire lanetan, batez ere koloreen erabileran.

Nola definituko zenuke zure estiloa? Surrealista tokea du, kolore biziekin adierazia. 60. hamarkadan egiten ziren rock kartelen eragina nabarmena da bertan. Gehienetan eskuz egiten dut dena, paper gainean margotuz. Batzuetan baina, herraminta digitalez ere baliatzen naiz azken ukitua emateko. Irudia argia eta zuzena izan dadila gustatzen zait, gehiegi kargatu gabea.

Zerk inspiratzen zaitu? Musika da nire inspirazio iturri nagusia, bai lanean eta baita bizitzako beste alorretan ere. Inguratzen nauen orok ere inspiratzen nau, eta baita beste artista batzuen lanak ere.

Lan egiterako orduan, ba al duzu mania edo ohiturarik? Nire mahaia hankaz gora jarri eta erabiliko ditudan material guztiak jartzen ditut bertan. Lanari ekin aurretik bestalde, gustuko dudan diskoren bat jarri ohi dut. Denbora gehiena zer egingo dudan, ideia nagusia zein izango den pentsatzen ematen dut. Paperaren aurrean jartzeko garaia izaten da errazena, gutxika dena ateratzen baita.

Musika talde, jaialdi eta taberna bat:Captain Beyon, bat esatearren. Gaur hau esaten badizut ere, bihar ez dakit hau izango ote den. Animoaren araberakoa da. Azkena Rock Jaialdia, besteren batera joateko aukerarik ez baitut izan. Baina asko ditut zerrendan, etorkizun batean joango naiz haietara. Abuelo de Vitoria. Taberna atsegina zen, izan ere, musika ona eta jende jatorra biltzen ziren bertan. Bertako oroitzapen itzelak ditut. Lastima da egun martxan ez jarraitzea.

Diseinatzaile izatea….. –ren sinonimo da: Behatzailearen sinonimo. Baita kuriosoarena ere. Artista guztiek duten ezaugarria dela uste dut. Gainontzeko jendeari axola ez zaizkion gauzak behatzen dituzte. Geroz eta gehiago behatu, orduan eta gehiago ikasten dugu.

Zertan zabiltza une honetan? Lookers taldearen hurrengo single-aren azala ari naiz lantzen. Azkenaldian kontzertuetara hurbildu den jendeak ezagun izango du Iparraldeko talde hau. Kontzertu asko ari dira eskaintzen azkenaldi honetan. Oraindik haien berririk jaso ez baduzue, ez itzazue galdu Andoaingo Rock Jaialdian. Energia itzela transmititzen dute zuzenekoetan.

MARTA ENNES (Donostia)

Irungo Kunsthal eta Donostiako Ceinpro-n ikasi zuen. Ikasketak amaitu zituenean, “afizio hutsez” bere bidetik ekin zion gauzak egiteari, eta hala garatu du bere estiloa. izan dezakezu haren berri Tumblr eta Facebook-en.

Markatu zaituen diseinatzaile bat: Ez dut bereziki markatu nauen diseinatzailerik.

Nola definituko zenuke zure estiloa?Rockeroa eta zuzena.

Zerk inspiratzen zaitu? Musikak, inongo dudarik gabe.

Lan egiterako orduan, ba al duzu mania edo ohiturarik? Ingurua txukun izan eta musika entzutea.

Musika talde, jaialdi eta taberna bat: Badakit oso tipikoa dela, baina bakarra izendatzekotan Black Sabbath-ekin gelditzen naiz. Ez dakit nire talderik gogokoena ote den, baina izendatu beharra daukat gogoko ditudan taldeetan eragin nabarmena izan duelako. Roadburn (Tilburg). Talde bikainak eta soinu kalitate itzela. Helduen giro begirunetsua, beharbada, serioegia. Eiger taberna. Bertan igaro ditut gau dibertigarrienak. Leku atsegina da eta beti jartzen dute musika ona.

Diseinatzaile izatea ….-ren sinonimo da: Irudimentsu eta sortzaile izatearen sinonimo.

Zertan zabiltza orain? Nire webgune pertsonalean nabil lanean.

SAIOA BURUTARAN NACHER (SUSI QUIU) (Donostia, 1986)

Milanen lizentziatu zen Arte Ederren alorrean (2008) eta hurrengo urtean Bartzelonako Felicidad Duce Moda Eskolan graduatu zen. Haren bezeroen artean Zara, Bershka, Donostia Kultura, sustatzaile musikalak… daude. Bere webgune pertsonalean aurkituko duzu informazio gehiago.

Markatu zaituen diseinatzaile bat: Henri Rousseau maite dut.

Nola definituko zenuke zure estiloa? Arkatza eta tinta erabiltzea gustuko izanik, beharbada garaikide ditudan beste diseinatzaileengandik bereizten naiz. Ordenagailua saihesten saiatzen naiz.

Zerk inspiratzen zaitu? Naturak, eskuz eginiko gauzak eta umeen marrazkiek inspiratzen naute.

Lan egiterako orduan, ba al duzu mania edo ohiturarik? Hiru aldiz meriendatzea, eta ahal izanez gero, crepe-ak nocilla-rekin.

Musika talde, jaialdi eta taberna bat: Bakarra? Ufff oso hautu zaila da, nire gustuek The Byrds eta Zeke har dezakete barne. Jaialdirik onena etxean egindakoa da. Eta taberna… segun eta zertarako… Cactus.

Diseinatzaile izatea…-ren sinonimo da: Bokazioa eta pobrezia.

Zertan zabiltza orain?Liburu ilustratu batean. Txoriak pertsona bilakatzen ditugu. Oso amateur-a.

SARA COMERÓN (Donostia, 1982)

Kazetaritza ikasi bitartean marrazten nuen, gerora Usandizaga institutuan Publizitate Grafika ikasi ahal izateko. “Diseinu grafikoaren mundura begira nago orain, batez ere kontzertu zein ekimen ezberdinetarako kartelak egiteko, hori da gehien dibertitu eta erakartzen nauena”.

Markatu zaituen diseinatzaile bat: Egia esan, ez dut bereziki markatu nauen diseinatzailerik. Asko eta askotarikoak atsegin ditut, garaikide eta “zaharrak”. Denek dute zerbait, baina inor ez da funtsezkoa niretzat.

Nola definituko zenuke zure estiloa? Ez dut uste estilo bakarra dudanik, eta baliteke horretarako goiz izatea. Gauza asko transmititu eta azaldu nahiak, estilo ezberdinetan aritzera bultzatzen nau. Edizio programak erabiltzeaz gain, marrazkia eta beste hainbat teknika grafiko erabiltzen ditut.

Zerk inspiratzen zaitu? Denak, ikusten ditudan gauza guztiek konta diezadakete istorio bat, eta edozerk har dezake lotzen nauen esanahia eta sinbolismoa. Bestalde, irudi grafiko eta artea dira orokorrean, inspirazio iturri nagusiak: zinema, musika, komikia, arkitektura, moda, literatura, pintura, eskultura, etab.

Lan egiterako orduan, ba al duzu mania edo ohiturarik? Musika entzutea. Batzuetan rock androll-a: mugimendua, ekintza. Bestetan, malenkoniatsua eta delikatua den zerbait. Nire animo eta lan erritmoaren araberako musika hautatzen dut beti.

Musika talde, jaialdi eta taberna bat: MC5, Azkena Rock Festival eta El Nido, Errege Katolikoak zonan.

Diseinatzaile izatea …-ren sinonimo da: Modu eraginkorrean mezu bat azaltzea mezu horren “bilgarrian” dagoenak pentsarazten digun bitartean.

Zertan zabiltza orain? Nire webgune berrian eta kurtso batean ikasleei entregatuko zaien dossierra maketatzen.