Gaixotasun larri bat gainditu du…
Aurreko urtean minbizi larri bat diagnostikatu zioten eta abenduaren 31ean izan zuen kimioterapiaren azken saioa. 2014 hasieran, ordea, eszenatokietan igotzen hasia zen jada. Behin baino gehiagotan esan du ahultasuna gainditzeko errezetarik emankorrena kontzertuetan egiten dituen ariketa fisikoak direla. Zuzenean ez da geldirik geratzen.
…baina arrasto batzuk utzi dizkio
Gaixotasunaren ondorioz, The Dap-Kings (Gabriel Roth-en taldea alegia, doinu eta abestien arduradunak) uste baino beranduago plazaratu du “Give The People What They Want” diska, beren seigarren lana. Kantuen letrak Sharon Jones-ek pairatu duen gaixotasunaren aurretik idatzi zituzten, baina abesti batzuk (“Retreat” eta “Stranger To My Happiness”) esanahi berriak dituzte minbizia pasa ondoren. Kursaalen normalean baino ile motzagoarekin ikusiko dugu Jones.
I´m black and I´m proud
James Brown bezala, Augusta-ko (Georgia) auzo batean jaio zen. “I Feel Good”-en abeslaria bezalaxe beltza da eta harro dago. Behin azalaren kolorea argitzeko esan zioten eta ezetz esan zuen.
Korista izan zen bakarlaria izan aurretik
Korista gisa hasi zen Lee Fields lagun eta soul abeslariarentzat. Gabriel Roth abeslari baten bila zebilen eta Jones-ek fitxatu zuen. Donostiara bi aldiz etorri da. Azkenekoa, 2012ko Jazzaldian, eta dexente lehenago Ilunbeko zonaldera, ia guztiz ezezaguna zenean. Gaur egun soul-funk musikaren erregina da.
Lehen arrakasta: “(How Long) Do I have to wait for you”
Sharon Jones and The Dap Kings-en bigarren diskan, “Naturally” (2005), agertzen den abestia da. Spotify-n, adibidez, ia 2 milioi erreprodukzio ditu eta taldearen diskografiaren gailurrenetako bat da. Geroztik ireki zitzaizkion arrakastaren ateak.
Beste erregealdia: Dap-Kings
The Dap-Kings azken urteotan soul musika berpiztu duen disketxearen talde nagusia da, Daptone Records. Sharon Jones eta, orohar, musika beltzak eskertu beharreko lan aparta burutu dute. Datu bat: “Black to Black” (2006), Amy Winehouse-n lan arrakastatsua, Brooklyn-eko Daptone Records estudioan grabatu zen.
Soul musika ez da gaztetxoen kontua
Salbuespen nabarmenak (Eli Paperboy Reed, esate baterako) baldin badaude ere, gaur egun egiten den soul ernagarriena zorigaiztoko bizitza izan duten jende helduak lantzen du: Lee Fields, Charles Bradley, James Hunter… Sharon Jones-i arrakasta 50 urterekin iritsi zitzaion. Aurretik denetarik egin zuen, besteak beste, kartzelan lanean ibili zen. Eta musikan ez zuela arrakasta izango esan zioten, zaharregia zela, emakume txikiegia…
2 Komentarioak
Bai bai bai… nik joan nahi dut kontzertua ikustera… Soul-a ikusteko ez ditut aukera gehiegi izaten eta. Menkantaria! Ea zortea dudan…
Mila esker parte hartzeagatik! Ea hurrengoan zorte gehiago duzun…:)