Bihar hasiko da Filmotekak antolatu duen EUSKAL ZINEMA: ZINEMAGILEEN HIRU GENERAZIO kongresua EHUk antolatutako udarako ikastaroen barruan. Bertan, euskal zinema zuzendaririk famatuenek hartuko dute parte; eta izenburuak argi uzten duen moduan, garaikideez gain, zaharragoak ere izango dira. Baina hemen, ez naiz horretaz mintzatuko. SADEK antolatutako ziklo paralelo batez baizik; bertan, euskal zinemaren historiako film esanguratsuenak ikusi ahal izango dira. Uztailaren 1etik 4ra bitarte egingo da zikloa, eta 5€ko kostua du sarrera bakoitzak. Film guztiak izango dira haien zuzendariengatik aurkeztuak, nahiz eta Julio Medem zalantza izan.
Ezin da Imanol Uribe falta. 80 eta 90ko hamarkadetako euskal zinemagile garrantzitsuena da, eta gai polemikoak lantzeagatik da ezagun, batez ere ETA eta horren inguruarekin loturikoak. Asteartean “La muerte de Mikel” ikusi ahal izango da. Honi “juego de lágrimas” izena ere eman diezaiokegu (edo hobe, alderantziz, aurrekoa baita). Homosexualitatea, politika eta terrorismoa 80ko hamarkadan.
Zikloko zuzendari interesgarrienetako bat da Montxo Armendariz, eta denboran oso atzera egin gabe aurki dezakegun film bat ikusteko aukera izango dugu: “Obaba”. Bernardo Atxagaren eleberriaren adaptazioa da; original eta freskoa da toke surrealista eta narrazio segmentatua dituen istorio hau. Film korala izanik, banaketa ona du: Pilar Lopez de Ayala, Eduard Fernandez eta Juan Diego Boto besteak beste. Misteriotsua, arraroa. Donostiako Zinemaldiko Sekzio Ofizialean egon zen ikusgai.
Ziur aski, zikloko zuzendaririk errespetatuena Victor Erice da. Haren film laudatuena aurkeztuko du, “El sol del membrillo”. Bertan, Antonio Lopez margolariaren lan batetik abiatzen da. Egun horretan ere izango da “Vacas” ikusgai, Julio Medemen lehen filma. Sinbologia eta baserriari eginiko erreferentziaz beterikoa; garaiko mitologia eta freskotasunaren artean dago. Zinez gomendagarria, nahiz eta ordu berean SADE zinemek “snowpiercer” ere eskainiko duten Truebako Ostegunetan. Hautaketa zaila, baina bietako bat ikusiko duzuenaren esperantza dut, pantaila handian gozatzeko bi film baitira.
Daniel Calparsoro zuzendariak berrikuntza ugari ekarri zituen, batez ere “Salto al vacio” filmarekin. Ikusi beharko da film hau nola kontserbatu den, ea bere garaian izan zuen inpaktu bera duen egun, baina ezbairik gabe, hautu errebelantea da. Garai hartako beste film berritzaile bat, baina beharbada harengana hurbiltzea zailagoa dena, Juanma Bajo Ulloaren “La madre muerta” da. Jaialdi askotan izan da, eta “Alas de mariposa” filmaren zuzendariaren garrantzia azaldu zuen, euskal zinemaren promesa. Egun baina, lau luze metraia bakarrik ditu.
Amaitzeko, ostiralean, Kimuak barneko laburmetraien hautaketa ikusgai izango da. Haien zuzendariek aurkeztuko dituzte, eta horien artean dira: Borja Cobeaga, Jose Mari Goenaga eta Pablo Malo, lan berria estrainatuko duten euskal zinemagileak.
Ikusgai izango diren film batzuk besterik ez ditut aipatu, baina hemen ikus dezakezue programa guztia:
Ez dago komentariorik