Ea azkenean eguraldiak pakean uzten gaituen. Hemen optimista xamarrak garenez udaran egin dezakegun plan bikain baterako prestatzen ari gara: terrazetara joan. Aurreko urtean hiru taberna gomendatu genituen uda hasi baino lehen eta aurten eskaintza lau terrazetara zabaltzen dugu. Bai ala bai bisitatu behar dituzun terrazak, alegia:
1-. Akerbeltz – Virgen del Coro, 10
Kulturaldiaren jarraitzaileok jakinaren gainean izango zarete Akerbeltz taberna asko maite dugula. Guztiz normala da eta askok berdina pentsatzen dute, besteak beste, Alde Zaharreko izkina honetatik dauden Kontxako badiaren bistak zoragarriak direlako. Egia da ondoko etxebizitzan hasi dituzten obrak (badirudi hotel bat eraikiko dutela) terrazaren espazioa murriztu duela, baina leku pribilegiatu bat izaten jarraitzen du. Gainera, garagardoa gustokoa baduzu ezin zara kexatu: hamaika garagardo artisau eskaintzen dituzte.
2-. La Carpa – Ondarretako hondartza
Txiringito edo terraza bat hondartzan? Berdin dio. Aurreko urtean ireki zuten Ondarretako hondartzan terraza polit hau eta zuku asko atera zioten. Nahi baduzu gintonic bat hartu dezakezu afal ostean, berandu arte irekiak egoten baitira. Horretarako, noski, eguraldi aproposa egin behar du. Jaten ematen dute eta aukera zabala da, pintxoak, bokatak eta razioak batipat. Tratua atsegina izaten da eta prezioa ez da garestiegia. Zurriolako Kiosko txiringitoak haren pausoak jarraitu ditu eta ireki berri duen terrazan antzeko karta jarri dute.
3-. Robinson -Frantzia pasealekua, 1
Hauek ere lehen urtean bultzada ederra eman zioten lokalari. Arratsalde batean gerturatzen bazara dj bat house musika jartzen topatu dezakezu. Edo bezeroren bat hanburgesa bat jaten ikusiko duzu, Robinson-en kartaren altxorra. Baina terraza da leku honi dizdira ematen diona. Gauzarik onena. Urumea erreka ikusten da bertatik eta baita zentroa ere.
4-. Botanika – Gernika Arbolaren pasealekua, 8
Kulturaldiaren inaugurazio festa hementxe ospatu genuen, beraz ezin dezakegu inolaz ere albo batean utzi txoko xarmangarri hau. Terraza leku erdi ezkutuan dago eta, aldi berean, donostiaren bihotzean. Hau guztia gutxi balitz nazioarteko sukalde osasuntsua dastatu dezakezu eta azkenaldian eguneko platerarekin nabarmentzen ari dira. Terrazan kontzertuak eta bestelako egitarauak antolatzen dituzte.
Ez dago komentariorik