Poltsiko antzerki jaialdia 90. hamarkadan hasi zenetik gaur eguneraino hamaika gauza aldatu dira. “Pentsa ezazu orduan lau kultur etxe genituela”, dio atzera begira Jon Aizpuruak, Donostia Kulturako Kultur Ekintzako arduradunak eta formatu txiki eta ertainak eskaintzen dituen antzerki-erakustaldi honen zuzendariak. Altza, Intxaurrondo edo Groseko kultur etxeetan jaio zen jaialdi xumelak 30 funtzio izango ditu guztira -“garapena handia izan da, ekimen arrakastatsua da hau”- otsailaren 11tik datorren 27ra bitarte. 25. urteurrena behar bezala ospatu nahi dute antolatzaileek eta programak, ohikoa den bezala, musika eta umorea, antzerkia, magia edo bakarrizketak bateratzen dituzten proposamen desberdinak biltzen ditu.
Zein da jaialdi honen helburua? Donostiaren antzerki programazioari bultzadatxo bat eman? “Hasieratik hiru helburu genituen: antzerkira normalean hurbiltzen ez den jendearengana iritsi, formatu txikiko antzezlanei irteera bat eman, askotan arazoak izaten dituzte eta haien lanak aurrera ateratzeko; eta, azkenik, auzoetako kultur mugimendua sustatu egiten dituzten jaietatik haratago”, erantzuten du Jonek.
Poltsiko Antzerkiaren ezaugarri berezietako bat, agian bereziena, donostiako areto eta taberna ezberdinetan aurkitu dezakezula doan eta ia edonon: Via Fora, Scanner, Bukowski, Picachilla, Doka, Koh Tao, Tanger, Beti Boga, El Nido, Borroto, Belgrado-n… Formatu honek nahitaezko hurbiltasun eta informal ikutua ematen dio.
Programazioari begibistatxo bat bota diezaiokezu funtzio bakoitza nondik nora doan ikusteko. Denetarik dago baina, hori bai, umorearen presentzia nabarmena da. Hala ere gogoratzen dizugu mamia asteakena otsailak 17an arratsaldeko zortzietan hasten dela Scanner tabernan “Sarean kateatuak” lanarekin (adi: mugikorrekin eta sare sozialekin dugun menpekotasunaz arituko dira antzezlan honen bitartez) eta geroztik beste 20 funtzio ikusteko aukera izango duzu. Aukerarekin zorte handiegirik ez baduzu ez zaitez larritu: taberna batean egongo zara zertxobait edaten lagunekin batera. Eta hori ez da inoiz plan txarra izaten.
Eskaintza zabala da eta Jon ez da atrebitzen KULTURALDIA-rentzat espresuki gomendio zehatzik egiten. Hori bai, antzezlanak aelatorioki programatzen ez dituztela argi utzi nahi du. “Tabernetan egoten den mugimendua eta giroa ikusten dugu eta gero, horren arabera, aukeratzen dugu non sartu komedia, non magia…”. Aurten ez dago mikroteatrorik -“ondo ikusten dugun mugimendua” den arren- eta 25. edizioan euskera eta gazteleraren arteko ekoizpenen kopurua orekatzen saiatu dira. Euskarazko sorkuntzak bultzatzen duen Antzerki Sorkuntzaren deialdiaren 6. lehiaketako irabazlea Nomofobikak taldearen “Sarean Kateatuak” izan da eta finalista Bazen Behin taldearen “Sexijentziak Askatuz”. Proiektu irabazleak eta finalistak, hurrenez hurren, 4.000 eta 3.600 euroko dirulaguntza jaso dute antzezlanaren sustapena eta ekoizpena burutzeko.
Bestetik, nabarmentzekoa da ere programatutako proposamenetan emakumezkoek duten presentzia, %60a ingurukoa. Honela, jaialdiak emakumeen eta gizonen gaineko berdintasunaren alde egiten du.
Egutegian azpimarratu behar dugun eguna bai ala bai 25. urteurrenaren jaia da: otsailaren 27 an Dabadaban, gaueko hamaiketan, Maribel Salas, Ane Gabarain, Yogurinha Borova, The Chanclettes eta Dj 2ttor, besteak beste, izango dira. “Festa handi bat egin nahi dugu”, amaitzen du Jonek.
Ez dago komentariorik