Bisitariekin topo egin du Detritusek galeriara sartu eta berehala. Iosu Expositori, 1992. urtean heroinaren erruz hil zen Eskorbuto talde mitikoaren liderrari, eskainitako kartelei so dago bikote bat.
– Garai hartan margotu zenituen kartel hauek guztiak?
– Urteotan batzuk egin ditudan arren, gehienak garai hartakoak dira, bai.
80. hamarkadatik 90.era bitarteko garai asaldatu hura irudikatzeagatik egin da ezagun artista donostiarra. Datorren urriaren 31ra bitarte egongo da ikusgai antimilitarismoari, intsumisioari, okupazioari eta euskal rock erradikalari erreferentzia egiten dion sorkuntza grafikoa, Arteko galerian (Iparragirre kalea 4). “Egiazkoa dena birdefinitu” erakusketa aukera aproposa da gazte eta errebelde zen Detritus, bai eta etapa berri bati ekin dion artista heldua ezagutzeko.
Hamaika urte Madrilen eta lehenago Estatu Batuetan bizi ostean, haur txiki baten ilusioa nabari da haren hitzetan Donostiarako bueltaz mintzatzen denean. Beltzez jantzita eta arantzaz beteriko eskumuturrekoak soinean, ez dirudi 50 urteren bueltan dagoen artista denik. Erakusketa honek, artistak izpiritu berriz hasi nahi duen etxerako buelta islatzen du. Rafael Berrioren laguna izaki, musikari donostiarrak Diego Vasallo eta Ramon Ederrekin (besteak beste) astero egiten dituen tertulietako zirriborroak erakusten dizkigu.
Gaur egun atseginen duen teknika oleoa dela azaltzen digu teknika bertsuz margoturiko formatu handiko koadro bat seinalatuz. Nihilista eta iluna den artista izaera alboratu gabe, haren diskurtsoa adierazpide ulerkorragora eramaten ari da, eta maiz errepikatzen du “kolaborazio” hitza. Harrigarria da, horren mardula den ingurune honetan elkarrizketak hartu duen norabide arina. Artistaren azken liburuek bizitza eta munduari buruz pentsatzen duena kutsu filosofikoz azaltzen dute. Erakusketan presente den “No future” slogan punk-etik harago doazen bide poetiko esanguratsuak eraiki dituela esan liteke. Donostian finkatuta, aurrera zein atzera begiratzen du Detritusek, haren kezkei zentzua emango dien kontakizunaren bila.
Ez dago komentariorik