Atzo Saritadinamita eta Madame Estricnina egon nintzela esaten badizuet, super heroinen komikien zale amorratua naizela pentsatuko duzue, edo rock kañeroa atsegin dudala, edo droga aluzinogenoren bat hartu dudala… baina badut espekulazio horien aurrean erantzuna. Egiatan Sara Mas eta Arantxa Lopetegirekin egon nintzen, Easo Avengers roller derby taldeko bi kiderekin. Saritadinamita eta Madame Estricnina bi donostiar hauek patinak jartzean gerrarako prest daudela adierazteko jarri dituzten ezizenak dira.
Kirol honen jatorria 20ko hamarkadako Estatu Batuetara atzeratzen bada ere, duela 10 urte berpiztu zen. Roller derby delakoa lau gurpileko patinetan praktikatzen da pista obalatu baten gainean. Ekipo bakoitzak hiru blokeatzaile eta pibote eta jammer bana dituzte. Azken hau da puntuak gehitzeko ardura duena. Ekipo bakoitzeko jokalariak, jammer-ak salbu, pack bat osatuz zelairatzen dira, eta jammer-ak hau pasatzen saiatu behar dira aurkarien pack-ak bera blokeatu baino lehen. Talde gehienak emakumezkoak dira. Espainian, Tenerifen sortu zen lehen liga 2010. urtean, eta ordutik, Espainiako hiririk handienek badute haien liga. Donostia ezin gutxiago izan.
“New York-era egindako bidaia batean ezagutu nuen, Manitoba-n -Dictators taldeko abeslariaren tabernan- garagardo batzuk hartzen nituen bitartean”, dio Madame Estricnina-k. “Roller derby partidu bat ari ziren telebistan ematen, eta nire gaztaroa quads-en gainean pasa dudanez, lehen begiratuan maitemindu nintzen, baina ezinezko ikusten nuen hura Donostian. Gerora, Bartzelonak, Madrilek eta Tenerifek halako taldeak bazituztela ikusi nuen, baita gutxinaka Estatuan zehar hedatzen ari zirela ere. Azkenik, 2013ko irailean halako talde bat sortzeko prest zeuden neskekin bat egin, eta hala hasi zen dena”. Saritadinamitak aldiz, taldea osatzen ari zenean izan zuen kirolaren berri. “Motibatuko ninduen kirol baten bila nenbilen, eta orduan izan nuen roller derby-aren berri. Hasi nintzen, engantxatu, eta orain kirol harentzat bizi naiz, hau da, eguneko 24 orduak asteko 7 egunetan zehar”.
Zer behar da roller derby-ra jokatzeko? Biek egin dute bat erantzunean: gogoak. Saritadinamitak azaltzen duenez, edonork joka dezake, nahiz eta aurretik inoiz patinatu ez. Patin eta protekzioekin (nahiz eta lineakoak izan) nahikoa da.
Mugimendu feministarekin lotu izan du askok roller derby-a. Arantxaren iritziz, hau ezin sahiestukoa da emakumeek praktikatzen baitute gehien kirol hau. “Beste mugimendu batzuekin ere lotu izan da, hala nola, rock and roll-a eta punk-a-rekin. Arrazoia hauek azaltzen duten jarrera borrokalaria eta DIY filosofia dira. Izan ere, talde askok dugu autogestioa oinarrian, eta askotan kalean bertan entrenatzen dugu guk geuk sorturiko zelaietan”. Saritadinamita-k baina, nahiago du kirola bera mugimendu ezberdinetatik kanpo ikusi, “baina egia da badagoela gu gosea eta jateko gogoarekin lotzeko tendentzia”.
Egun, Easo Avengers-eko neskek estatuko beste taldeekin topaketak eta Tarbes-en (Frantzia) Torneo bat antolatu dituzte. Azken honetan Bilboko taldearekin egingo dute bat euskal selekzioa antolatuz (Euskal Okelakp). Era beran, badute eskaera berriei erantzuteko gogoa. Haien Facebook-eko profilean aurki ditzakezue, baia easoavengers@gmail.com web postan ere.
Ez dago komentariorik