Urtero bezala etorri eta joan egingo da Durangoko Azoka. Datorren abenduaren 5etik 8ra ospatuko da euskal kulturaren ospakizun honen 49. edizioa. Jakina den bezala, Azoka Euskal Herriko argitaletxeen eta diskoetxeen lanak ezagutzeko plaza aproposa da eta sortzaileek euren irakurle eta entzuleekin egoteko aukera dute. Egia da kulturzaleen topalekua bilakatu dela eta baita, bide batez, euskararen termometro kulturala neurtu dezakegula ere.
Gainera, abenduaren 3an euskararen eguna ospatzen da. Euskal musikan -euskaraz abesten den musika, alegia- arreta jartzen baldin badugu, zenbait taldeek deitu didate atentzioa azkenaldi honetan. Gehienak Azokan noizbait jo edo aurten joko dute. Goazen bada errepaso bat egitera. Baina, lehenik eta behin, Gorka Bereziartua AKA @boligorria-ri eskertu nahi nizkioke Twitterren bidez emandako gomendioak. Mila esker!
kaskezur
Denetarik aurki dezakegu nafarroatik datorren Kaskezur taldearen “Ilgora” diskan: rock zuzena, funk doinuak, stoner apurtxoren bat… Rock and roll inguruan lantzen diren estilo ezberdinak jaso dituzte, hain zuzen ere. Eta emaitza ez da batere kaxkarra.
Napoka Hiria
“Arnasten Ikasteko Berriz” bikoteak 2013an kaleratu zuen lan txukunaren izenburua da. Sarako estudio batean jasotako zortzi kanta hauek Eibar eta Elgoibarretik datorren bikotearen alderdi indie-folk atmosferiko eta intimista sakontzen dute. Zentzu honetan, “Ibiltzeko gertu” abestia oso adibide aproposa da.
Lou Topet
Ipar Amerikako indie folka gogorarazten duten doinuak euskaraz jorratzen dituzte Lou Topet zarauztarrak. Grabatu duten azken kanta Imanol Urbietaren omenez ekoitzitako ‘Bakarrik eta libre’ diskorako egindako ‘Txoria nintzela’ abestiaren moldaketa da. Ohio meets EH.
Mursego
“Hiru (3)” diskan (2013) ia edozertarako gai dela berriro ere erakutsi digu Mursegok -kunbia doinuak sartu ditu, adibidez-, baina arrasto sakona, erraz ezabatzen ez den horietakoa, “Eusnob”-en letra mamitsu eta umoretsuan aurkitzen da.
Jupiter Jon
Kraut, post-punk eta oihaneko doinu basatiak gustokoak dituzte. Ez da erraza deskribatzen irungo taldearen sonoritatea. Euskal Herrian ez dago horrelakorik. Karlos Osinagaren kolaborazioarekin kaleratu zuten “Pleistozenoko astelehenak” (2011) estreinako lana eta ezagutu dugun azken kanta hau da:
Joseba Irazoki
Gaur egungo Euskal Herriko eszena rockero eta ez rockeroan Joseba Irazokik miresle asko ditu. Ez zaie arrazoirik falta. Apala, gitarjole trebea eta sortzaile bitxia, Joseba Irazoki nafarrak bere lagunak bildu ditu plazaratu berri duen izen berbereko diskan. Talentu handiko pertsona da.
Niña Coyote eta Chico Tornado
Zuloak taldeko partaide izan zen Úrsula Strong (Las Culebras) eta Koldok (Surfin Kaos) osatzen dute. Doinu latzak, stoner ikutuak, jarrera eta imajin erakargarria. Donostiatik Joshua Tree desertura.
Willis Drumond
Egia da Willis Drumond sekula gelditzen ez den talde horietako bat dela. Lapurdiko mutilak Neil Young zein Mikel Laboa erreibindikatzen dute eta pasa den azaroak 28an sarrera guztiak agortu zituzten (20 minututan!) hondarribiako Psylocibenea aretoan.
Perlak
Facebooken biografian aitortzen duten bezala Zarauzko lokal batean, ardo tragoxkaden artean, jaio zen Perlak taldea. Erraz sartzen den 80. hamarkadako post-punk musika lantzen dute eta influentziak The Cure, Joy Division, New Order, Siouxsie & the Banshees… dira.
Larry Bird
Azkenaldian hiru abesti grabatu dituzte eta binilo formatuan argitaratzeko ideiari bueltak ematen ari dira. Momentuz, saskibaloi jokalari mitikoaren izena hartu duen talde bilbotarraren lehenengo demoa entzun daiteke bandcamp-ean. Nondik nora doazen? 90. hamarkadako indie-rock anglosaxoairekin erlazionatu genezake problemik gabe.
Belako
Talde bizkaitar gaztea -20 urteren inguruan dabiltzate- da Belako. Arrakasta dexente lortzen ari dira gure artean eta, bereziki, Euskal Herritik at. Ingelesez abesten dute gehienbat, hori ere aitortu behar da. Aurpegi ezberdinak erakusten dituzte (post-punk, elektronika, pop-rocka) eta gorantz doaz zentzu guztietan. Gero eta hobeto.
Ez dago komentariorik