10 egun besterik ez dira geratzen Olatu Talkako zazpigarren ediziorako; aurten maiatzaren 20,21 eta 22an egingo da. Ohikoa denez, eta antolakuntzatik azpimarratu dutenez, “urtean zehar hiritarrek garatu dituzten ekintzen erakuslehioa izango da”. Gainera, aurtengo edizioak “hiria birplanteatu eta transformatzea” du helburu; hortik dator #hiriaegin lema. Aurtengo leitmotiv-ak hainbat puntu kritiko (arriskutsuak direnak, eta gehienetan eremu femeninoari eragiten diotenak) “puntu atsegin eta dibertigarriagoetan” transformatzea du helburu. Horretarako arteaz eta sormenaz baliatuko dira.
150 proposamen baino gehiago jaso dituzte musika, kirola, antzerkia, teknologia berriak, dantza, gastronomia, ingurugiroa eta artearekin loturikoak. Proposamenak aztertu eta landu ostean, azkenean, 200 baino gehiago izango dira aurtengo programazioan parte hartuko dutenak. Mordo bat dira, gehiegi beharbada Olatu Talkak irauten dituen hiru egunetarako; hala, KULTURALDIAn horiek aztertu ostean, bost aukeratu ditugu.
Noski, hau hautu guztiz subjektiboa izan da; hartara, gure aholkuak interesatzen ez bazaizkizu, programazioa irakurtzea besterik ez duzu.
OSTIRALA, MAIATZAK 20
Basoka 2.0
Lekua: Miramongo basoa, Basque Culinary Center-etik
Ordua: 19:00-22:45
Iaz arrakasta izan zuen jaialdiarekin ireki dugu gure aholkuen zerrenda. Stringedwood Donostiako folk musika elkartea dabil antolakuntza lanetan. Miramongo basoan izango da jaialdia, Basque Culinary Centerretik gertu. EHUko arkitektura ikasleek moldatuko dute espazioa, eta Indigo, Luke Amstrong, Adam Giles Levy, Iker Lauroba eta Charley and The Colours ariko dira bertan. Landa-musika inguruarekin armonian izango da, beraz.
OSTIRALA, MAIATZAK 20
Kontzertuak
Lekua: Kursaaleko terraza
Ordua: 22:00-01:00
Musika gehiago. Kursaaleko terrazan kontzertuak egitea ez da berrikuntza handia, baina biziki interesgarria da antolakuntzak aukeratu duen alineazio lokala -bide batez, bat dator gure azkenaldiko gustuekin-. Luma bikote gaztearekin hasiko da gaua; askotariko influentziak eta 70eko hamarkadako musikaren oinarria duen taldearekin. 22:45etan Buffalo talde instrumentala ariko da; duela gutxi jo zuten Grande Days-ekin batera (00:15). Bi taldeen artean, (23:30) izango dugu, beharbada proposamen bitxiena dena entzuteko aukera; Israel Marco, Cuchillo taldekoa, eta Alvaro Sauk osatutako bikoteak musika eta zinema nahastuko dituzte. Itxura oso ona duten lau kontzertu.
Xabi eta Ion, Luma eta Grande Days
LARUNBATA, MAIATZAK 21
Urbazientzia
Lekua: Iztueta, epaitegiaren inguruetan
Ordua: egun guztian zehar
Haur zein helduentzako moduko topaketa zientifiko bat izango da. Iztuetan egingo dute, hiriko puntu kritikoetako batean. Zientziaren munduan sartzeko modu atsegin eta dibulgatzailea aurkeztuko dute. Teknahi eta beste agente batzuk antolatutako ekimen honetan, ikerkuntza zentroetan egindako lana ikusarazi nahi dute. Nola? Bada, gaia ikustarazteko modu ezohikoez baliatuko dira: monologoak, hitzaldiak, tailerrak, erakusketak, zuzeneko irratsaioa…
LARUNBATA, MAIATZAK 21
Hizkuntzen gunea
Lekua: Katalunia plaza
Ordua: egun osoan zehar
Donostia 2016ko filosofiarekin bat egiten duen ekimena da honakoa. Iaz, Donostiako 101 Hizkuntzak iniziatibak Donostian hitz egiten diren hizkuntza guztiak biltzeko asmoarekin stand bat jarri zuen, Boulevardean. Aurten, Membus proiektuaren berri izango dugu (Europa guztia zeharkatzen ari den autobusa da hau, eta herrialde bakoitzean hitz egiten den hizkuntzarekin bideo-hiztegi digital bat egitea du helburu); In Varietate Concordia, 2016ko erakusketa honek hirian bertan present dauden hizkuntzen arteko zubiak eraiki nahi ditu modu “ludiko-poetikoan”; Vic-eko 150 castellers-ak; elkarbizitza linguistikoaren inguruko tailerra (Enpatinaxion); Kantu eta Kontu ekimenean, berriz, jatorri ezberdinetako pertsonek euskaraz eta beste hizkuntzetan kantatuko dute, haien herrialdeei buruz hitz egingo dute, etab.
LARUNBATA, MAIATZAK 21
Kontxa Gaumarket
Lekua: Kontxako aterpeak
Ordua: 18:00-00:00
Beharbada, hau izan zen 2015eko Olatu Talkako irabazlea?; lortutako arrakastaz oharturik, ezin dugu azoka hau alboratu. Alor ezberdinetako (argazkigintza, diseinua, grafiko-bisualak, zeramika, moda, ilustrazioak, dekorazioa, vintage, eskulanak…) 50 postu bilduko dira azokan. Ekimen honen helburua “denda fisikorik ez dutenei haien diseinu eta produktuak erakusteko aukera ematea” da.
Iaz, ekimen hau udan zehar egitea ere proposatu zen; ea oraingo honetan proposamen hori burutzerik badagoen. Stand-ez gain, musikaz eta arte instalakuntzez ere gozatu ahal izango da. 2015ean bezala. Eguraldiak laguntzen badu arrakastatsua izango da, ziur.
Ez dago komentariorik