Azkeneko 10 egunetan Donostia 2016 osatzen duen muina, Pablo Berastegui zuzendaria barne, kultur hiriburuaren kontzeptua explikatzen saiatzen egon da hiritarrek proiektuari berriro ere ilusioz heltzeko helburuarekin. Guztira bost bilera antolatu dituzte auzo ezberdinetako bizilagunekin: behin Lugaritz Kultur Etxean, bitan 2016 gunean, Tomasene Kultur Etxean eta Ernest Lluch-en. Jakina denez, programazioren mamia ezin da urte amaiera arte zabaldu -epearen xehetasunak Bruselasetik finkatzen dira-, baina lehenengo aldia da batere erraza suertatzen ari ez den proiektua jendearekin partekatzen dutela.
Xehetasun asko daude oraindik argitzeke. Hori egia da. Inaugurazioari begira Danborrada erraldoi baten zurrumurrua iritsi zaigu baina 2016ko bulegotik ez dute ezertxo ere konfirmatu. Chillida-Lekuren etorkizuna ere airean dago. Azkeneko momentuan ateak zabalduko dituzte? Bestetik, badirudi aurrekontuak behera egin duela (63 milioi eurotik 47,8ra pasa omen da, hau da %25 gutxiago). Babesle pribatuen berririk ez dugu… Lan ugari egin behargo dute 2016koek, gehiegi agian.
Dena dela goazen Donostia 2016ko proiektuari buruzko informazioa mahai gainean jartzera. Seguru uste baino gauza gehiago ateratzen direla. Bide batez, aitortu beharra dago Hiribuaren webgunean azaltzen den informazioa oso ondo dagoela. Gauzak diren bezala.
Bi ardatz: kultura + bakea
Egia da oso kontzeptu zabalak direla, zabalegiak, baina proiektuaren iturria horiek dira. Haien esanetan “2016ko Europako Kultur Hiriburutza aukera handia da kulturaren eta elkarrizketaren aldeko apustua egiteko; hiriak hori aprobetxatzea erabaki du horien bidez elkarbizitza hobe bat eraikitzeko”. Bakearen kultura.
Gainontzeko ardatzak: partaidetza + iraunkortasuna
Olatu indar famatuak, hiritarren partaidetza, funtsezkoa da filosofiaren proiektua uler dadin. Edonork aurkeztu dezake nahi duen proiektu kulturala. Honen ondorioz, antolatzaileentzat da hain garrantzitsua jendearen inplikazioa. Gainera ondare espezifiko bat sortzeko moduan diseinatu da programa. Partaidetza eta iraunkortasuna, beraz.
Ez dira Kultura-arloak, itsasargiak baizik
Programa osoa hiru “itsasargi” ezberdinetan sartu dezakegu: Bakearen itsasargia (antzerkiak eta kontzertuak, batipat, “gizarte begirunetsuago, zuzenago eta solidarioago baten hazia ereiteko helburuarekin”), Bizitzaren itsasargia (multzo honetan sartzen diren aktibitateak bizitza osasungarriago, humanistago eta osasuntsuago bat lortzeko helburua dute), Ahotsen itsasargia (adierazpen artistiko ezberdinak jorratuko dira zeintzuk “komunikatzeko, galdetzeko eta hunkitzeko gaitasuna” azaltzen duten.
Programa: momentuz, 12 kultura-jarduera
Guztira 12 kultura-jarduera ezagutzera eman dira hiritarrekin eduki dituzten bost bilera hauetan. Ahotsen Itasargiaren esparruan, adibidez, Shakespearen “Sueño de una noche de verano” ospetsuaren emanaldi bat ikusiko dugu Kristina Enea parkean; Corners of Europe, non diziplina anitzetako 6 artista euskaldun (Juan Aizpitarte, Beatriz Churruca, Ixone Ormaetxe, Borja Ruiz, Asier Zabaleta eta Joseba Irazoki) Europako beste 50 artistekin kolaboratuko duten; In varietate concordia, aldiz, erakusketa eta liburu fonetiko-poetiko batekin amaituko da 11 donostiar eleaniztunekin hitzen arteko esperimentu bitxi bat burutu ostean; eta bukatzeko Emusik izeneko makrokontzertuak 26 herrialde ezberdinetako 20.000 musikari bilduko ditu pieza klasiko zein modernoak interpretatu ditzaten.
Bakearen itsasargiarekin erlazionatuta Bakearen Akordioa nabarmentzen da, “Europan inoiz ikusi den bakeari buruzko erakusketarik handiena”. Honetaz gain, elkarbizitza eta adiskidetza bultzatzeko antzerki bat prestatuko da (Antzerki forum: eta hik, zer?); Dance 2gether dantza komunitarioan umeak dituzten ohiko rolak ezabatuko dira; eta melhfas (Saharako emakumeen jantzi tradizionalak) osaturiko jaima baten instalazioak giza eskubideen gaia eta emakumeraren egoera lantzeko balioko du.
Azkenik, Bizitzaren itsasargian Tabakaleraren laborategi teknologikoa den Hirikilabs bultzatuko da; Time Machine Soup izeneko performancean 12 zopa historiko probatuko dituzte; eztabaida irekiak jendea gai Europearrekin konprometitu dadin zein, besteak beste, Jose Manuel Durão Barroso agintaria egongo den; eta Euskal Herriko paisai naturalak ezagutzeko ibilbide bat ere antolatuko dela aurreratu digute.
Ez dago komentariorik