Saturnino Delgadoren bezero ohiak ileapaindegira bueltatuko balira sorpresaren bat edo besterekin topatuko lirateke. Duela 42 urte Delgadoren ileapandegiaren inguruan betiko dendak pilatzen ziren: alfonbra dendaren bat, mertzeria bat, garraio agentzia, automobilak konpontzen dituzten mekanikariak… Paisaia (ia) guztiz aldatu egin zaio Zabaleta kaleari eta Nafarroa hiribidea eta Kataluina plaza arteko tartean gauzak ez dira lehen bezala izango. Delgadoren establezimendua mirarizko fenomenoa da, denborak aurrera joan ahala bizirik jarraitzen baitu. Gaur egun haren seme-alabak ileapaindegiaren negozioa daramate.
Ez dira Zabaleta kalean tabernak eta kafetegiak falta. Taberna eta jatetxea ere den Salteko beiratetik Zurriola hondartzaren zatitxo bat ikus daiteke. Otsaila geroztik dago irekita eta bertan gosariak, eguneko menuak (9 euroren truke babarrun plater osoa jan dezakezu edaria eta ogiarekin), 6/7 euro artean zerbitzatzen dituzten koktelak… eskaintzen dituzte. 200 metro karratu ditu guztira eta bi solairutan banaturik dago. Behean, jolas-areto bat ere badago. Gran Via kaleko espaloia gurutzatuz taberna ugarirekin egiten dugu topo. Capricho da horietako bat eta Kontxa eta Zurriola hondartzetako argazki handiekin dago apianduta. Establezimendu handia, surf zale eta ñoñostiarrentzat oso aproposa dela dirudi. Kartel batean ikus daiteke pintxo-potea asteartea eta ostegunetan ere egiten dutela.
55. zenbakian La Guinda kafetegia kokatzen da. Hemen ere kartak eta menuak dituzte. Xarmaz beteriko gunea da orain duela bi urte Romina Mosquerak ireki zuen establezimendua. Barnean goxotasuna da nagusi eta egurrez josita dago. Langileekin hizketan hasten garenean inguruko bezeroekin lan egiten dutela aitortzen dute. Zerbitzari batek mahairaino ekartzen digu eskatutako kafea eta bitxikeri moduan dio bera ere bezeroa izan dela bertan lanean hasi aurretik. Nabaritzen da pozik dagoela. Eta zerbait gomendatzeko eskatzen diogunean limoizko pastela eta txokolatezko pastela zatiak seinalatzen ditu beste askorekin batera. “Ezingo nuke bakar bat aukeratu!”, aitortzen du. Atera eta eskubira biratzen dugunean Essencia Ardodenda-rekin topatzen gara. Delgado ileapaindegiaren parean gaude. Ezin dugu barrura pasa. Dirudienez, dozena erdi bezero ardo-dastatze pribatu batean daude eta Iñaki eta Dani, denda honetako jabeak, ezin garela sartu abisatzen digute edukazio osoz. Hogar Dulce Hogar kafetegia Bermingham kalearekin gurutzatzen da. Izena goxoa badu ere ez du La Guinda-ren xarmarik. Hala eta guztiz ere ederki ekipatua dago: Wifi seinalea, liburuak, sofa erosoak etab.
Badaude betiko zaporea mantentzen duten establezimendu ale batzuk. Mito estatusa lortu duen Mandarin txinatar jatetxea edo Casa Galicia jatetxea, bi adibide argi dira. Azkeneko hontan euskal sukaldaritza eta galiziarra fusionatzen dituzte. Pintxo bat hartu nahi badugu eta patata tortila zalea bazara… ez zaitez larritu. Zabaleta tabernan primerakoak egiten dituzte. Ez dago batere gaizki beheko solairuan ezkutatzen den Zas taberna. Paretak gorriz margotuta ditu eta pare bat eskailera jeitsi behar dira baxu batera iristeko. Hori bai, nahiko estua da.
Erosketak egin nahi badituzu eskaintza ez da hain oparoa izango, baina tira, denda interesgarriren bat aurki daiteke. 43. zenbakian, beste baxu batean, Vintage closet dago eta arropa vintage-a eskainiko dizute; ondoan, itsatsita, ez ohiko arropa saltzen duten La Fábrica de Colores denda kokatzen da. Behin Cataluina plazara iristen bazara oinez jarrai ezazu Teorema tabernara iritsi arte. Bertan musika dotorea entzun dezakezu. Gaur, esate baterako, Nikki Hill-en diskoa jarri dute.
Ez dago komentariorik