“Mendia” izenburuarekin izan dugu San Telmo museoan otsailak 21etik maiatzak 18ra arte euskal mendizaletasunari buruzko erakusketa arrakastatsua. Bisitari askok ikusi dute euskal gizartean oso zabalduta dagoen kirola, Euskal Herriaren sinboloa bilakatu den ohitura, alegia. Gainera, ez ditu soilik mendizaletasunaren une historikoak azaltzen, baizik eta alderdi kultural eta sozialak ere kontuan hartzen ditu. Dena dela, beti gertatzen ohi den bezala, seguru badagoela baten bat erakusketa ikusi gabe geratu dena; bai azken orduko bisita bat egiteko ideia zuelako edo udara arte egongo zela uste zuelako, edo… haren existentziaz ohartu ez delako.
Kasua da martxoan gomendatzen genituen erakusketa haien azken txanpan gaudela. Tristea izango litzateke erakusketa hauek ez baldin badituzu ikusten; seguruenik aurtengo arte sorta onenaren aurrean gaude. Eta, adi, guztiak doan dira. Lehenik eta behin Koldo Mitxelenara abiatzen gara: “Paisaiaren murmurioa”-ren azkeneko eguna datorren maiatzaren 30ean izango da. Bai, egia da artearen munduan paisaiak behin eta berriro interpretatu direla. Aspertu arte. Baina 10 artista euskaldun hauek modu orijinal batean aztertzen dute izadia eta gogoeta aberats batera bultzatzen gaituzte kanon estetikoak alde batean utzi gabe. Paisaien zehar egin dezakegun bidai ezberdin bat. Paisaia inoiz ikusi ez duzun bezala.
Koldo Mitxelenan jarraitzen dugu, oraingoan Ganbara areto txikian, bertan “Gorputz grafiak” erakusketarekin gozatu dezakegulako; euskal Herrian feminismoak izan duen ibilbidea aztertzen duen erakusketa ausarta da, 60. hamarkadatik gaur eguneraino. Duela gutxi, Munilla apezpikuak kritikatu du erakusketa erlijioa askatasunaren aurkako “erasoak” omen daudelako. Hobe: erreibindikazio feministez blai egiteko arrazoi berri bat daukagu. Kasu honetan erakusketa ikusteko epea luzeagoa da eta ekaina erdialde arte irekia egongo da. Dena dela, badakizu. Ez zaitez fidatu: ez ezazu azken ordurarte utzi.
Post hartan aipatzen genuen eta berriro errepikatzen dugu: Pablo Genovés bezalako artista bat gure artean edukitzea ohore bat da. Esan beharra dago “El ruido y la furia” erakusketak arrakasta handia izan duela madrilen eta lan haien aukeraketa zabala aurkitu dezakegu maiatzaren 27 arte Altxerriko arte-galerian. Argazki apokaliptikoak dira; ederrak eta dekadenteak aldi berean. Ikusgarria.
Askotan goraipatua izan den argazkilaria eta margolaria dugu José Manuel Ballester, besteak beste Argazkigintzako 2010eko Sari Nazionala jaso du bere ibilbide pertsonalagatik. “Bosques de luz” erakusketa benetan bitxia eta interesgarria da. Argazkiak ote dira? Margo-lanak? Bi diziplina hauen arteko nahasketa bat? Arkitekturaren eta hiriaren inguruko begirada erakargarri bat proposatzen du eta Kubo Kutxa aretoan egongo da datorren maiatzak 31 arte. Ikusi behar duzun beste erakusketa bat… beranduegi izan aurretik.
Ez dago komentariorik