Hasteko, gaur egungo errealitatean finkatuta ez dagoela argi dago. Aretoak handiak badira ere horrek ez du ezer esan nahi; Bretxako areto batzuek estuak dira eta luzeegiak. Ondorioz, eserleku gehiegi daude eta pantalla txikiegia ikusten da. Soinuaren kalitatea, azkenaldian hobetu bada ere, ez da kristona. Azken finean zaharturik dauden zineak dira eta seguruenik ez da errentagarria izango oso handia baita.
Itxi egin behar zutenean esan zutenean, Juan Karlos Izagirre alkateak anbulategi bat, gimnasio bat eta Turismo bulegoa eraman nahi zituela bertara esan zuen. Zentzuzkoa den bezala, dendariak ez daude ados erabakiarekin eta pare bat urte daramatzate presioak jasaten,“laneko jazarpena”, beraien ustetan. Hemen argi dagoena da udaletxea ez dela zinearen alde dagoen eragilea eta interesak mahai gainean jarri dituela argi eta garbi. Eta udaletxea aurka badago, zaila izango dute dendariek alokairuaren kontratu eta izapide guztiak behar diren bezala negoziatzen.
Baina azkeneko albistea da Bretxa konplexuak ez duela ixten. Ikusiko dugu azkenean zer pasatzen den; museko partidan dabilen jokalariaren ordagoa dirudi hau eta 2025. urte arte duen kontratuaren indemninazioa negoziatzeko jokaldi burutsua ematen du. Donostian ohikoa denez, denok gogoan izango duzue zer pasa zen Warner-ekin, zineek takilaren ahuleziarengatik zein higiezinen sektorearen gai ilunengatik ixten dutela uste dut.
Kalitatea albo batean uzten badut, uste dut Bretxako zinearen ixtearen albistea ez dela batere ona. 7 arrazoi emango ditut:
1- Krisia
Edozein negoziok krisi garaian ixten duenean beti da albiste txarra. Eta gaur egun, hare eta gehiago.
2- Zinearen krisia
Zinearen industriarentzat bereziki oso une latzak dira eta gehienbat Estatu mailan. Gero eta areto gutxiago badaude gero eta aukera gutxiago izango dute filmek distribuzio egoki bat burutzeko.
3- Monopolioa
Bretxa ixten badute zinearen monopolioa ezarriko da Donostian SADE enpresaren eskutik. Egia da jatorrizko bertsiozko filmak eskaintzen dituztela eta, normalean, kalitatezko zinema bermatzen dutela. Dena dela kontsumitzailearentzat monopolioak ez dira inoz positiboak izan.
4- Norbaitek egin beharko du lan zikina
Bretxan film komertzialak estreinatzen dituzte, komedia eta akzio mordoa duten pelikulak hain zuzen ere. Agian ez da zuen gustokoa izango baina areto hauek betiko desagertzen badira besteak (SADE-ko aretoak) proiektatu beharko dituzte lan hauek eta leku gutxiago egongo da film alternatiboentzat.
5- Ez da dena kaka zaharra
Zinemaldian ikusi genuen: “Eden” filmaren pertsonaiak dio “Showgirls” bikaina dela. Eta gaur egun “Showgirls” Donostian estreinatuko balitz non ikusiko genuke? Bretxan. Zine hauetan joan den urtean ikusi genuen “Juerga hasta el fin” (ingelesez “This is the End”) eta baita “Scott Pilgrim contra el mundo” edo Arnold Schwarzenegger-en azkeneko filmak.
6- Belaunaldi berriak
Bai eskaintza eta baita kokapenarengatik gaztetxoak Bretxa aukeratzen dute zinera joan nahi dutenean. Ixten badituzte Antiguara joan beharko dute edo, gauzak gaur egun nola dauden ikusita, ez dira berriz zinera joango. Ezin ditugu gaztetxoak galdu.
7- Ez luke albiste ona izan behar
Udaletxearentzat albiste ona izan daiteke, baina ez zinea maitatzen dugunontzat. Beraz, guztiaren aurka borrokatzen ari den horiei eskertzen diet esfortzua. Scott Pilgrim bera bezala. Bretxa munduaren aurka. Ez dakit zenbat iraungo duten baina, niregatik, Nicolas Cagen datorren pelikulan ikusiko gara elkar.
Ez dago komentariorik