2008an Irungo Bentak eta Gaintxurizketa Gainaren artean eraiki zen bidea, zeina rotonda zabal batean amaitzen den, eraginkorra izan da zirkulazio arriskutsua ekiditeko. Jada ez da arriskutsua zela eta (arrazoi osoz) kritikatzen zuten ibilbide hori. Gainak 37 metroko radioa duen biribilgunea du orain, Lezoko errepidea, Erain eta inguruko baserriak lotzen dituena. Zonaldeko hiru jatetxe ezagunenenetara heltzeko abiapuntua ere bada.
1-. Usategieta:
Eraineraino doan aldapatik gora, Opusen eskola baino apur bat beherago, Usategieta jatetxea dago. Baserri itxura zaindua mantentzen du eta hainbat zuhaitz mota (sagarrondoak, haritzak, magnoliak) eta baratzak osatutako lorategi handi batek inguratzen du eraikina. 2008an bertako menuak El Diario Vascoren Premio Más Gastronomía irabazi zuen, eta ordutik hona aldatu bada ere, merezi du oraindik.
Besteak beste honako plater hauek daude menuan: txangurro tartaleta gainerrea, tomatea eta mozarellarekin betetako pasta onddo saltsan eta kabratxo entsalada mugurdi maionesarekin; bigarren plateren artean aldiz, ahate-bularkia Idiazabal saltsan eta txekor saiheskia goarnizioarekin. Etxeko postreak ere zoragarriak dira. Ardoa, sagardoa eta ura barne, 20 euro guztira.
2-. Iriarte-Enea:
Usategietaren parean dago kokatuta, biribilgunearen beste aldean. Eraikinak, terrazan jateko aukera ematen duen baserri zuri soilak, ez du beharbada gidarien arreta erakartzen. Jatetxe familiarra da: gurin askoko kroketa handiak edo zainzuriak hasteko; entsalada; eta labean egindako zapoa, etxeko izarra, oliba olioa, baratxuria eta piperminekin egindako olio erre eta guzti. Zapo bat nahikoa da bi lagunentzat. Postre gisa, etxeko flana da aukera onena. Batzuek arrai goxoaren lekua deitzen duten jatetxeak ez du hutsik egiten, eta pertsonako 25-30 euroko prezioa du.
3-. Patxiku-Enea:
Lezora bidean, errepidearen albo batean betiko erretoki horietako batekin egingo dugu topo. Patxiku-Enea baserriak 200 urte ditu eta jatetxea 70. hamarkadan jarri zuten martxan hainbat anai-arreben artean. Belaunaldi berriak darama orain tradizioan oinarritzen den jatetxearen zuzendaritza: txuleta errea, barazki egosiak, legatza, bisigua… David de Jorgek gomendatzen du; eta Robin Foodek badaki zerbait jatearen arteaz.
Ez dago komentariorik