Musika Parkean ekimenaren antolatzaileek 2013ko jardunaldia Urgull mendian amaitzea erabaki zuten. Eguerdiko ordu bietan eman zitzaion hasiera “mesedez, zapaldu belarra!” lematzat duen ekitaldiari. Ondorengo lerroetan, azken Musika Parkean eguneko kronika pertsonal musikal-gastronomikoa eskainiko dizuet.
13:30 Duda: Autobusez edo oinez
Bulebarra da abiapuntua. Dirudienez, Urgullera -120 metrotik gora doan mendia- igotzeko bi autobus antolatu dituzte eguerdiko lehen eta azken orduan. Gezurra badirudi ere, eguzkiak gogor jotzen duen egun horietako bat da. Aukera erosoena zein izango ote den eztabaidatu ostean, lagun koadrila honek Urgulleko aldapak oinez igotzea deliberatu du.
13:45 Ogitartekoak
Argi dugu zer nahi dugun. “Hori da” eta “Dakhara” tabernetako ogitartekoen erreferentzia ona dugunez, hori izango da gure bazkaria. Batzuek lehenengo taberna hautatzen badute ere, besteok abuztuaren 31 kaleko taberna estuan sartzea aukeratu dugu. Taket deituriko ogitartekoa hautatu dut (oilasko bularkia, tipula karamelatua, gazta urtua eta piperrak, ogi egin berrian). Hori baino lehen, ultramarino denda batetik igaro gara garagardo lata hotzak erosteko. Denetara zazpi euro inguru.
14:00 Malda
Ez dugu Jesusen Bihotzeraino iritsi beharrik, baina Guardetxea pasa ostean, bidea luze egiten da. Kexuka igo gara, baina albotik karroari bultzaka igotzen diren gurasoak ikustean, isildu egin gara lotsatuta. Basoak irentsi egiten gaitu pixkanaka itsasoa albo batera dugularik.
14:30 Nor da azkena?
Atentzioa deitzen du zelaigunean bildu den jende andanak; familiak eta gazte koadrilak, denak nahastuta. Lan zaila da leku huts bat aurkitzea. Larritasun unea. Burua altxa eta soinu teknikariaren atzean lekua dagoela imajinatu dut. Inor ez dago eta! Korrika irten naiz disimuluan lagunak abisatu ostean.
14:45 Tupperrak
Ingurura begiratu ostean, gehiengoak etxean sukaldatu duela konturatu naiz. Ugari dira belar gaineko manteletan dauden plastikozko plater eta tupperrak; mendian egindako egun pasa batek behar duen legez. Tortillak, errusiar entsaladak, barazki “quiche”-ak, hestebeteak, enpanadak… Aniztasunak harritzen nau.
15:00 John Berkhout
Gazte boskote bat taularatzen da, eta ondorengoak liluratzen nau:
- Ingelesez (ondo) kantatzen dute
- Hots armonia (hiru abeslariko koroa)
- Soinu melankoliatsu eta atsegina
- Oiartzuarrak dira
Azken urteotan 60. hamarkadako folk estiloa biziberritu duten taldeak oroitarazten dituzte (Fleet Foxes eta Bon Iver). Errepertorioa propioa izateaz gain (“The Path”, “Good Morning”, “Sun Beaches), Elliot Smithen “Angels In The Snow” abestiaren bertsio fidela egin dute. Hatzarekin zerua seinalatuz, lagun bati eskaini diote abesti bat. Warnerrek ongi egin zuen hauek fitxatzen, ez dago dudarik.
15:30 Anana bat da! Anana bat da!
Urgullen biltzen den janari ugaritasunaren artean, plater batek harritu nau bereziki: inongo konplexurik gabe, arrautza egosiz, ganbaz, ahuakate eta mango zatiz beteriko anana erdiak!
16:00 Sandwich lehiaketa
Emanaldien artean, sandwich irabazlearen izena eman dute. Saltsa guztietan dagoen Illarrako Joxean Eizmendi da komentarista.
16:30 Partido
Bartzelonako taldea, eguneko talde nagusia da. Giro independentean oihartzun handia izan zuen taldearen “Leaving All Behind” 2012ko debut lanak, eta “Jesus” haien EP berrian, pop-rock mintzaira klasikoan barneratzen dira, folk kutsu eta soinu amerikarren ezaugarriak gehituz. Teklistak daraman loredun alkandora ausartaren inguruko komentarioak entzun ditut. Urgullen ez dute jendea haiengana gerturatzea lortu. Ez da udako arratsalde batean gozatzeko sintonia musikala baino gehiago.
17:00 Itzulera
Urgull goitik, zoragarri ikusten da Kontxa. Pena merezi du paisaiaz gozatzeko geratzeak. Alai jaitsi gara; badirudi hankak hegan doazela. Itsasoa ezkerretara utzi eta segituan aurkitu dugu Guardetxea. Musika ateratzen da bertatik. Sociedad Gastronomicako kurba hartu, eta Alde Zaharrera iritsi gara.
Ez dago komentariorik