Badira egun batzuk webgune honetan Donostiatik gehien gustatzen zaizkizun 25 gauzak posta aurkeztu genuela, eta gustukoen ditugun gauzen artean aipatu genuen Truebako ostegunak delakoa. Donostia bezalako hiri txiki batean bizi den zinemazalearentzat, zoriontasun hutsa da urte guztian zehar entzute handiko zine zuzendarien solasaldi zein klasiko handiez gozatu ahal izatea. Ekimen honi ostegunetako Groseko pintxo-potea gehituta, plan ezin hobea eskaintzen zaigu ostegun arratsetarako. Baina goazen harira: aurkeztu dute jada urtarrila eta otsailean ikusgai izango diren filmak:
“El PADRINO III” filmarekin itxi zuten azken Truebako Ostegunak-eko agenda. Baliteke nork edo nork film hau aurreko biak bezain cool-a ez dela esan izana, 70. hamarkadako argazkilaritzaren boterea faltan bota izana, eta baita Robert Duvall faltan bota eta Sofia Coppola sobran dela uste duenik ere egongo da ziurrenik. Baina nik beti egin dudan moduan defendatzen dut film hau. Izan ere, maila dramatikoan amaiera ezin hobea du, berebiziko izaeradun filma da, Sofia ez da diogun bezain txarra, eta batez ere, Garcik esan moduan “Zein handia den zinema”, zentzu handiagoa du trilogia honek jarraian ikusi ezkero. Eta horixe da hemen egiten ari garena. Truebako ostegunei beharrezko amaiera eman zitzaien Pacinoren leherketa pantaila handian ikusiaz.
NeusBallús-en “LA PLAGA” zuzendari onenaren sarirako hautagaia izan zen pasaden Goya sarietan, Premio Discovery-rako hautagaia Zinema Europeoaren Sarietan, eta hori guxti balitz, Berlinale-n izan zen aurkeztua. Funtsean krisi ekonomikoaren gaia lantzen duen tonu dramatikoko dokumentala da. Michael Hanekeren jarraitzaile garenoi poztasun handiak transmititzen dizkigun zinemagile austriarraren zikloak “EL CASTILLO” filmarekin jarraituko du ostegun batez gehiago. Hautu ezin hobea da bere obrarekin gozatzen dugunontzat, izan ere austriarraren film hau ez da besteak bezain ezaguna eta ez dira askoz aukera gehiago egongo filma pantaila handian ikusteko. Kafkaren obran du oinarria. Burokrazia eta alienazio soziala. Kafkak eta Haneke-k batera eskaini dezaketena mundiala behar du.
Locarnoko zinemaldian film katalan eta galiziar bat izan ziren sarituak, baina tamalez, ezin izan ditugu zine aretoetan ikusi. Orain baina, aukera dugu. “HISTÒRIA DE LA MEVA MORT” izan zen urrezko leopardoa den sari potoloaren garaile. Filma aurkeztera Albert Serra dator. “Ez dakit zinemagile bikaina naizen. Dakidan bakarra, gaur egun Espainian dagoen zinema zuzendaririk hoberena naizela da”, esan zuen gizon bera. Hau ikusita, imajina ezazue nolakoa izango den filmaren osteko solasaldia. Ezin hura galdu.
Bestalde, “COSTA DE MORTE” filmarekin Lois Patiñok “Ezagun egiteko bidean dagoen zuzendari onenaren” saria irabazi zuen eta film hau ere Trueban izango dugu ikusgai. “GENTE SIN SITIOS” filmaren aurkezpenarekin azken gonbidatua izango da Juan Cavestany. Egia esan, Twitter bidez askok eskatu dugu film hau. Zine espainiarraren film onenen zerrendan egon da eta Zinemaldian ikusi ezin izan genuenek, ez dugu hau ikusteko aukerarik izan oso areto gutxitan estreinatu baita.
Zientzia fikzioaren maitale garenoi, sekzio berriari “Noches Scifi” izenburua emateak soilik, hegan jartzen gaitu. Gainera “2001 ODISEA EN EL ESPACIO” filma aukeratu dute sekzioa estreinatzeko. Historiako film onenetako bat da, baita zientzia fikizioaren sostengu nagusienetako bat ere. Gaur egun genero honetan egiten diren filmen (“Sunshine”, “El árbol de la vida”, edo “Gravity”) erreferentzia dugu; baina egia esan, pantaila handian askoz hobea da. Bere garaian denbora asko eman zuen zinetan, LSD-z goraino zihoazen hippie-entzat moda zen film hau ikustera joatea sekuentzia psikodelikoez gozatzeko. Baina tira, pintxo-potean hartuko duzuena zuen esku dago!
Ez dago komentariorik